Në prag të Ditës së Alfabetit shpaloset videoja e parë 3D kushtuar alfabetit shqip për të gjithë fëmijët
Stella dhe Sani janë heronjtë e animacioneve të para 3D në gjuhën shqipe dhe kanë për qëllim edukimin e më të rinjve duke krijuar material me cilësie të lartë, ku do të afirmohet gjuha amtare, si dhe do të zhvillohet imagjinata fëmijërore me muzikë dhe lojëra adekuate për moshën e tyre.
Ky projekt vjen në momentin e duhur, kur imagjinata e lirë e fëmijëve dhe padyshim edhe e të rriturve, është më e nevojshme se kurrë dhe është kyçe për zhvillimin e fëmijës në ato vite jashtëzakonisht të rëndësishme.
Projekti prezantohet në prag të Ditës së Alfabetit, 22 nëntor, me një video origjinale e cila pritet të jetë kënga e preferuar e çdo fëmije.
“E pritëm këtë datë për të filluar projektin Stella dhe Sani që nisma të ketë jehonë edhe më të madhe dhe Dita e Alfabetit në vitin 2020 të festohet me një këngë dhe video të veçantë për shkronjat tona të arta. Përpos kësaj video, në vijim do ketë edhe video të tjera që përfshijnë: mësimin për kafshët, nxitja e shprehive për higjienë personale dhe rruajtjen e mjedisit jetësor, shoqëri dhe bashkëjetesë multietnike, tolerancë dhe miqësi, mësim i ngjyrave, sendeve, rrethinës etj. – shprehet Bleta Begu, një nga udhëheqëset e projektit.
Televizioni Alsat M do t’i shfaqë ekskluzivisht të gjitha videot e projektit duke filluar nga videoja e alfabetit të cilën mund ta ndiqni që sot.
Animacionet janë krijuar nga studioja e mirënjohur nga Maqedonia e Veriut për produksion dhe post produksion filmik “Vertigo Visual”. Deri më tani, kjo studio ka punuar efekte vizuale për më shumë se 50 filma të kategorisë së parë (A) në Hollivud, hite të njohur si Spiderman 5, Black Panther si dhe fitues të shumë çmimeve në festivale prestigjioze ndërkombëtare.
Tekstet e këngëve në shqip janë të shkruar nga gazetari, aktivisti dhe tekst-shkruesi Petrit Saraçini. “Kur bëhesh prind e kupton mungesën e materialeve në gjuhën amtare dhe prandaj fëmijët zgjedhin materiale në gjuhë të huaj. Me shumë kënaqësi e pranova ftesën për projektin “Stella dhe Sani” që të bëjmë diçka cilësore për fëmijët tanë dhe gjeneratat që vijnë. Nuk ka dyshim që këta do jenë miqtë më të mirë të fëmijëve, shumë shpejt.” – shprehet Petriti.
Projekti është i mbështetur nga Fondi për Inovacion dhe Zhvillim Teknologjik në suaza të thirrjes publike për kofinancim të granteve për komercializim të inovacioneve që mundësojnë qasje në përmbajtje kreative dhe cilësore.
